आजको निर्वाचनमा कहाँ के भयो ? जान्नुस यी १३ रोचक घटना

काठमाडौँ । दोस्रो चरणको प्रदेश तथा प्रतिनिधि सभा निर्वाचन सोचेभन्दा शान्तिपूर्ण भएको छ । देशका ४५ पहाडी र तराईका जिल्लामा भएको निर्वाचन अपेक्षाकृत शान्तिपूर्ण भएको हो ।

तर, ती जिल्लामा मतदानका क्रममा केही रोचक घटना भएका छन् । कहीँ पैसा नपाएर मतदाता भोट हाल्नै गएनन् भने कहीँ मतदान गर्न जाँदा मतदाताले ज्यान गुमाए । आउन कहाँ के भयो विस्तृतमा चर्चा गरौँ ।

पैसा दिएपछि मत हाल्न गए गाउँले

दलहरुले पैसा बाँडेपछि जिल्लाको एउटा गाउँका मतदाता भोट हाल्न गएका छन् । पैसा नदिएसम्म भोट नहाल्ने अडानमा घरमै लुकेर बसेका जिल्लाको सखुवा प्रसौनी गाउँपालिकाको देउवाना ‘ख’ मतदान केन्द्रका मतदाता भोट हालेका हुन् ।

दलका प्रतिनिधिले घर घरमा पुगेर पैसा बाँडेपछि उनीहरु ट्याक्टर चढेर भोट हाल्न निस्केका थिए । अल्पसंख्य र दलित समुदायको बस्ती रहेको देउवाना गाउँका अधिकांश मतदाता घरैमा बसेका थिए । उनीहरु जसले पैसा दिन्छ, उसैलाई मतदान गर्ने भन्दै मतदान केन्द्रमा गएका थिएनन् ।
यस्तो समस्या तराई मधेसका धेरै जिल्लामा रहेको छ । पैसा नपाएसम्म मतदान नगर्ने अडानमा बसेका देउवानाका मतदातालाई पैसा दिएर ट्याक्टरमा राखी मतदान गराउन लगिएको हो ।

११९ वर्षीयाबाट मतदान

डडेल्धुरामा एक सय १९ वर्षकी वृद्धाले मतदान गरेकी छन् । जिल्लाको अमरगढी नगरपालिका ६ भज्नेउटा मतदान केन्द्रबाट एक सय १९ वर्षीया पर्वतीदेवी खड्काले मतदान गरेकी हुन् । मतदानका लागि उनी घरपरिवारका सदस्यको सहायतामा मतदान केन्द्र सम्म पुगेकी थिइन् ।

११६ वर्षीयबाट मतदान

बर्दियाको मैनापोखरमा रहेको शारदा मावि मतदानकेन्द्रमा ११६ वर्षीय अगनी थारुले मतदान गरेको निर्वाचन अधिकृत हिरण्यप्रसाद भण्डारीले जानकारी दिएका छन् ।

कास्कीको मादी गाउँपालिका–८ स्थित ध्रुव मावि मतदान केन्द्रवाट १०२ वर्षीय वामदेव सापकोटाले मतदान गरेका छन् । डडेलधुराको अजयमेरू गाउँपालिका वाड नं २ सहश्रलिङ्गस्थित चमडा मावि मतदा केन्द्रमा १०३ वर्षीया बेलु देवी ऐरले मतदान गरेकी छन् ।

एउटै केन्द्रबाट तीन नेताको भोट

इलामको एउटै मतदान केन्द्रबाट तीन राष्ट्रिय नेताल मतदान गरे । इलाम नगरपालिका–७ को बालमन्दिर आधारभूत विद्यालय मतदान केन्द्रबाट तीन नेताले मतदान गरेका हुन् ।

एमाले नेता तथा पूर्वसभामुख सुवान नेम्बाङसहित तीन नेताले यहाँबाट मतदान गरेका हुन् । यस्तै नेपाली कांग्रेसका नेता तथा पूर्व भौतिक पूर्वाधार तथा यातायात राज्यमन्त्री केशव थापाले पनि सोही केन्द्रबाट मतदान गरे ।

यसै केन्द्रबाट नेपाली कांग्रेसका पूर्व महामन्त्री केबी गुरुङले पनि मतदान गरेका छन्।

मतदाता संख्याः ९६०, तर शून्य मतदान

सप्तरीको प्रतिनिधि सभा निर्वाचन क्षेत्र नं. २ स्थित महादेवा गाउँपालिका २ का स्थानीयवासीले मतदान वहिस्कार गरेका छन् ।

सिके राउतको गाउँसमेत रहेको महादेवा गाउँपालिका २ स्थित आधारभुत विद्यालयमा रहेको मतदान स्थलका स्थानीय मतदाताले मतदान वहिष्कार गरेका हुन ।

जिल्लाका कुल २९५ मतदान स्थल मध्ये २ सय ९४ मतदान स्थलमा विहान ७ बजेदेखि नै शान्तिपुर्ण मतदान सुरु भएको छ । तर उक्त स्थानमा मतदान नै भएन ।

मतदानको सम्पुर्ण तयारी गरेर बसेपनि एकजना पनि मतदाता नआएको मतदान अधिकृत धनेश्वर साहले बताए ।

आधारभुत विद्यालय मतदान स्थलमा ९६० मतदाता छन् । मतदाताहरुले पटक–पटक भएका निर्वाचन र ति निर्वाचन मार्फत चुनिएका प्रतिनिधिले विकास निर्माण र नागरीकको जीवनस्तर सुधारमा चासो नदिएकाले मतदान वहिस्कार गर्ने निष्कर्षमा पुगिएको प्रतिक्रिया दिए ।

यहाँ सिके राउतले उर्दी जारी गरेपछि मतदाता भोट हाल्न नगएका बताइए पनि स्थानीयबासीले भने त्यसबारे मुख खोल्न चाहेनन् ।

मतदान गर्न जाँदा गयो ज्यान

डोटीमा मतदान गर्न जानेक्रममा एकजना बृद्धा महिलाको मृत्यु भएको छ । खापरमाण्डौं आधारभुत बिद्यालय कोटसलेना रहेको मतदान केन्द्रमा मतदान गर्न जानेक्रममा पुर्विचौकी गाउँपालिका ठ तिमुरदहकी ७६ वर्षीया मुनादेबी कामीको मृत्यु भएको हो ।

मृतक महिला दमको रोगी भएकाले उकालोबाटो हिँड्दा मृत्यु भएको जिल्ला प्रहरी कार्यलयले जनाएको छ ।

किरियापुत्री उम्मेदवारबाट मतदान

आमाको मृत्युपछि किरियामा बसेका नयाँशक्ति नेपालका तर्फबाट कास्की क्षेत्र नम्बर १ बाट प्रतिनिधिसभा सदस्यका उम्मेदावार उम्मेदवार सौगात पोखरेलले मतदान गरेका छन् ।

उनले पोखरा लेखनाथ महानगरपालिका वडा नम्बर २६–बिजयपुरस्थित भवानीकालिका मावि मतदान केन्द्रमा मतदान गरेका हुन् ।

एउटै मतदान केन्द्रमा १२ किरियापुत्रीबाट मतदान

सुनसरीमा किरियापुत्रीमा बसेका मतदाताले पनि भोट हालेका छन् । सुनसरीको क्षेत्र नम्बर १ स्थित धरान उपमहानगरपालिकाको वडा नम्बर ६ को मतदान केन्द्रमा किरियापुत्री बसेका १२ जनाले मतदान गरेका छन् ।

सरस्वती उच्च मावि मतदान स्थलमा एकै गाउँका ३ घरका १२ जना किरियापुत्रीले मतदान गरेका हुन् । नयाँ संविधान कार्यान्वयनको लागि ऐतिहासिक रुपमा प्रदेशसभा र प्रतिनिधिसभाको निर्वाचन भएकोले मतदान गर्न आएको किरिया पुत्री बसेका मतदाताहरुको भनाई छ । मतदानमा सहभागि बिदोन विश्वकर्माले भने, ‘यो ऐतिहासिक घडी हो । हाम्रो अधिकार सुनिश्चित गर्न, संविधान कार्यान्वयन गर्न र उपयुक्त प्रतिनिधि पठाउन पनि मतदान गर्न आयौं ।’

किरिया पुत्री बसेका विनोद विश्वकर्मा र उनकी श्रीमति देविका विश्वकर्मा, रणध्वज लोहार र उनकी श्रीमति माया विश्वकर्मा हुन् । विनोद र रणध्वजका बुबा रामबहादुरको मंसिर १६ गते देहान्त भएपछि उनीहरु किरिया पुत्री बसेका हुन् ।

यस्तै, आमा रुक्मिणादेवी अधिकारीको मृत्यु भएपछि किरिया पुत्री बसेका छोरा हरिकृष्ण अधिकारी र श्रीमति जमुना अधिकारीले पनि मतदान गरेका हुन् । यसैगरि, आमा यशोदा कट्वालको किरियापुत्री बसेका नैनबहादुर कटवाल र श्रीमति हर्कमाया कटवाल, चन्द्रबहादुर कट्वाल र श्रीमति दुर्गा कट्वाल, शिव कटवाल र श्रीमति कमला कट्वालले पनि मतदान केन्द्रमा पुगेर मतदान गरेका थिए ।

मतपत्र च्यातियो, मतपेटिका फुटाइयो

मतदान अधिकृतले हस्ताक्षर नगरी मतदान गराएको भन्दै दलका प्रतिनिधिले विरोध जनाएपछि अर्घाखाँचीको सन्धिखर्कस्थित एउटा केन्द्रमा मतदान स्थगित भएको छ ।

सन्धिखर्कस्थित मथुरा निमावि ‘ख’ मतदान केन्द्रमा मतदान अधिकृतले १३२ वटा मतपत्रमा हस्ताक्षर नगरी भोट हाल्न लगाएपछि विवाद हुँदा मतदान स्थगित भएको हो ।

मतदान अधिकृत सुरेन्द्रराज अधिकारीको हस्ताक्षरविना १३२ जनाले मतदान गरेको थाहा पाएपछि स्थानीयबासी विरोधमा उत्रिएका थिए ।

विरोधमा उत्रेका स्थानीयबासीले मतपेटिका फुटाएर मतपत्र समेत च्यातेका छन् भने मतदान केन्द्रका फर्निचर पनि भाँचेका छन् ।

निर्वाचन अधिकृत रामचन्द्र पौडेलका अनुसार स्थानीयबासीले मतदान केन्द्र तोडफोड गरेपछि मतपत्र, मतेपटिका र अन्य निर्वाचन सामग्रीसहित निर्वाचन टोलीलाई कार्यालयमा फिर्ता बोलाइएको छ ।

अछाममा कांग्रेसको यस्तो हर्कत

चौरपाटी गाउँपालिका–५ लुंग्रामा रहेको दयापिपलतोला मावि मतदान केन्द्रमा झडप भएको छ । नेपाली कांग्रेसका कार्यकर्ताले फर्जी मत हाल्न खोज्दा झडप भएको स्थानीय धिराजन खड्काले जानकारी दिएका छन् ।

प्रहरीले स्थिति नियन्त्रणमा लिन ३ राउण्ड अस्रुग्यास प्रहार गरेको छ । उक्त स्थानमा अहिले नेपाली सेनाको हेकिप्टरले हवाई गस्ती गरिरहेको छ ।

अहिले धेरैजसो मतदाता स्थानीयको घरमा लुकेर बस्न बाध्य भए । उक्त मतदान केन्द्र अछाम क्षेत्र नं १ प्रदेशसभा क्षेत्र नं १ का नेपाली कांग्रेसका उम्मेदवार मेघराज खड्काको मतदान केन्द्र हो ।

मतदान केन्द्रमै भोजभतेर

पाल्पाको क्षेत्र नम्बर २ तानसेन नगरपालिका–५ स्थित जनहित प्राथमिक विद्यालय मतदान केन्द्रमा मतदातालाई मासुभात खुवाउने प्रतिस्पर्धा चलिरहेको छ ।

लोकतान्त्रिक गठबन्धन र वाम गठबन्धनले आ–आफ्नो पार्टीलाई भोट दिएबापत मासुभात खुवाउने व्यवस्था गरेका हुन् ।

नेपाली कांग्रेसले आफ्नो पार्टीलाई भोट दिने मतदातालाई मासु भात खुवान सुरु गरे लगत्तै नेकपा एमालेका तर्फबाट पनि मासुभातको व्यवस्था गरिएको हो ।

बारामा पनि कांग्रेसले यसो गर्यो

नेपाली कांग्रेसका कार्यकर्ताले निर्वाचन आचारसंहिता विपरित मतदातालाई मतदान केन्द्र नजिकै खाजा नास्ता बाँडेका छन् ।

मतदान गर्न जाने र मतदान गरेर आउनेहरुलाई बाराको जीतपुर सिमरा उपमहानगरपालिका–१२ को फत्तेपुरमा मतदान केन्द्र अगाडि कांग्रेस कार्यकर्ताले खाजा बाँडिरहेका हुन् ।

निर्वाचन आचारसंहितामा मददान केन्द्र नजिक मतदातालाई प्रभावित गर्ने कुनै पनि गतिविधि गर्न पाइँदैन ।

जनकपुरबाट सिके राउत पक्राउ

प्रहरीले निर्वाचन विरोधी गतिविधि गरेको आरोपमा मधेसमा राष्ट्र विखण्डन अभियान चलाइरहेका सिके राउतलाई पक्राउ गरेको छ ।

राउतलाई जनकपुरस्थित डेराबाटै पक्राउ गरी हिरासतमा लिइएको धनुषाका प्रहरी प्रमुख एसपी चक्रबहादुर सिंहले बताए ।

सिके राउतको अगुवाईमा सप्तरीको महादेवा मतदान केन्द्रमा अहिलेसम्म पनि मतदान हुन नसकेपछि प्रहरीले उनलाई पक्राउ गरेको हो ।

Janata Tv

प्रतिक्रिया दिनुहोस्
विशेष

मितिः २०७५ कात्तिक १ गते विहीबार बिहान ५ः०० स्टेसन आइडी ५ः०२ राष्ट्रिय गान ५ः३० तीर्थ पर्यटन प्रस्तोताः नारायण भण्डारी ६ः००…

–नारायण भण्डारी नेपाली समाजमा भव्यताका साथ मनाइंने महान् पर्व बडा दशैंको नवौं दिन आश्विनशुक्ल नवमी तिथिमा देवी भवानी महागौरीको पूजाआराधना…

काठमाडौंं । महाअष्टमीका दिन बुधबार मुलुकभरका शक्तिपीठ र देवीस्थानमा श्रद्धालु भक्तजनहरूको भीड लागेको छ । शक्तिका प्रतीक महाकाली, महालक्ष्मी, महासरस्वती…

प्रत्येक वर्षजस्तै यस वर्ष पनि दशैंं सबैको घरआगनमा आइसकेको छ । दशैं नेपालको सवैभन्दा लामो समय सम्म मनाइने चाड हो…

मितिः २०७५ असोज ३१ गते बुधबार बिहान ५ः०० स्टेसन आइडी ५ः०२ राष्ट्रिय गान ५ः३० तीर्थ पर्यटन प्रस्तोताः नारायण भण्डारी ६ः००…

–नारायण भण्डारी नेपाली समाजमा हर्ष उल्लासपूर्वक मनाइने शारदीय महापर्व बडा दशैंको आठौं दिन आश्विनशुक्ल अष्टमी तिथिमा प्रचण्डघोर कृष्णशक्ति स्वरुपा भवानी…