नियन्त्रणमा आएन भाइरल, मर्नेको संख्या १२ पुग्यो, दुईहजार बिरामी

जाजरकोट । झन्डै तीन साता अघिदेखि फैलिएको भाइरल ज्वरोको प्रकोप नियन्त्रणमा आउन सकेको छैन ।

भाइरल प्रभावित क्षेत्रमा स्वास्थ्य शिविर सञ्चालन गरे पनि गाउँबाट बिरामी शिविरमा आउन नसक्दा उपचार कार्य प्रभावकारी हुन नसकेको हो । बिरामी गाउँमा छ्याप्छ्याप्ती भए पनि शिविर ल्याउनका लागि मानिस नहुँदा उपचार प्रभावकारी हुन सकेको छैन । एकै घरमा चारभन्दा बढी बिरामी हुनुका साथै जिल्लाबाट पाएको औषधिले काम नगर्दा मंगलबार सुईबाट दिने औषधि लिएर थप पाँचजना डाक्टरको टोली जुनीचाँदे गाउँपालिकातीर लागेको जिल्ला स्वास्थ्य प्रमुख रामबहादुर नेपालीले बताए ।

भाइरल प्रभावित क्षेत्रमा सक्रिय चिकित्सक डा पवन शाक्यका अनुसार मंगलबार बिहान जुनीचाँदे गाउँपालिका–३ रावलगाउँका ५४ वर्षीय लालबहादुर भण्डारीको ज्वरो र पखालाको कारण ज्यान गएको छ भने सोमबार जुनीचाँदे गाउँपालिका–२ मौगानका दुई महिनाका शिशुको भाइरलका कारण ज्यान गएको छ । यो सहित मृत्यु हुनेको संख्या १२ पुगेको छ ।

नमूना जाँचको लागि काठमाडौँ पठाइयो

सोमबार मृत्यु भएका शिशुलाई कडा खालको भाइरल अर्थात एचवानएनवानको शंका लागेकाले खकार र सिँगान परीक्षणका लागि रोग नियन्त्रण महाशाखा, टेकु, काठमाडौँको प्रयोगशालामा पठाइएको उपचारमा खटिएका डा शाक्यले जानकारी दिए ।

परीक्षणबाट एचवानएनवान प्रमाणित भए गाउँमा भाइरलको महामारीको नै हुनसक्ने डा शाक्यले बताए । जुनीचाँदे गाउँपालिकाको वडा नम्बर १, २ र ३ लगायत अन्य वडा र बस्तीमा भाइरल फैलिएको छ । पाँच वर्षमुनिका बालबालिका र दीर्घरोगीमाथि कडारुपमा देखिएको भाइरल ज्वरोबाट अहिलेसम्म १२ जनाको ज्यान गइसकेको छ । रुघाखोकी, ज्वरो, टाउको दुख्ने, पखाला लाग्नेजस्ता लक्षण भाइरल पीडितमा देखिएको छ ।

नियन्त्रणमा हुन नसक्दा थप स्वास्थ्यकर्मी पठाइयो

भाइरल प्रभावित गाउँमा जिल्ला अस्पताल र प्राथमिक स्वास्थ्य केन्द्र, गर्खाकोटबाट परिचालित चिकित्सक तथा अन्य स्वास्थ्यकर्मीको टोलीले रोग नियन्त्रणमा ल्याउन नसकेपछि मंगलबार फेरि जिल्ला अस्पतालबाट थप चिकित्सक र औषधि प्रभावित क्षेत्रमा पठाइएको छ ।

एकजना चिकित्सकसहित दशजना स्वास्थ्यकर्मी, नेपाली सेनाका स्वास्थ्यकर्मीको टोलीले उपचारमा सहयोग गर्दा पनि प्रकोप नियन्त्रणमा आउन नसकेपछि जिल्ला अस्पताल, जाजरकोटका मेडिकल अधिकृत डा भूपेन्द्रप्रकाश मल्ल, नेपाल रेडक्रस सोसाइटीका स्वयंसेवकसहित अन्य स्वास्थ्यकर्मीको समूह औषधिसहित प्रभावित क्षेत्रमा हिँडेको जिल्ला स्वास्थ्य प्रमुख रामबहादुर नेपालीले जानकारी दिए ।

अन्य ठाउँमा सर्दैछ भाइरल

उपचारमा खटिएका स्वास्थ्यकर्मीका अनुसार जिल्लाको दुर्गम तथा विकट जुनीचाँदे गाउँपालिकाको वडा नम्बर २ र ३ मा शुरुमा देखिएको भाइरलको प्रकोप अहिले अन्य क्षेत्रमा पनि सर्दै गएको छ । स्वास्थ्यकर्मीका अनुसार सातसय भन्दा बढीको उपचार गरिसकिएको छ र अझै दुई हजारभन्दा बढी बिरामीको उपचार गर्न बाँकी छ । गाउँ गाउँमा जान नसकिएका कारण र सामान्य खालको औषधिले काम नगर्दा उपचारमा चुनौती थपिएको छ ।

भाइरल प्रभावित क्षेत्रमा रहेका अधिकांश विद्यालय बन्द गरिएको छ । चिसोका कारण उपचारमा निकै समस्या थपिएको छ ।

Janata Tv

प्रतिक्रिया दिनुहोस्
विशेष

–खेम बम पछिल्लो समय नेपाली राजनीतिमा मार्सी चामलको खुबै चर्चा छ । यसको पृष्ठभूमीमा छन्– नेकपाका अध्यक्षद्वय केपी शर्मा ओली…

– राधिका जोशी सुनिँदै, बोलिँदै अनि लेखिँदै आयो, ‘स्वास्थ्य संस्था मन्दिर अनि र डाक्टर भगवान ।’ जसरी हामी मन्दिरमा फूलअक्षता…

–प्रतिमा चौधरी कसैले तपाईंको इमानदारिता, साँचोपन, बुद्धिमत्ता वा राम्रो पक्षबारेमा थाहा पाउन सक्दैनन्, जबसम्म तपाईं आफ्नो कामद्वारा उदाहरण प्रस्तुत गर्नु…

–रामकुमार/पुष्पा/शिव काठमाडौं । रेशम चौधरी अर्थात् २०७४ मा भएको संघीय निर्वाचनमा कैलाली क्षेत्र नम्बर १ बाट निर्वाचित सांसद । तत्कालीन…

काठमाडौं । विदेश जानकै लागि नक्कली विवाह गरेको घटना त हामीले प्रशस्तै सुने देखेका छौँ, तर अब घटना यस्ता पनि…

कृषिमा व्यावसायीकरण, विशिष्टीकरण तथा औद्योगिकरणका माध्यमबाट बेमौसमी तरकारी तथा फलफुल ठूलो परिमाणमा छिमेकी देश भारत, बङ्गलादेश लगायत खाडी मुलुकहरू, थाइल्याण्ड…