गुल्मी । श्रम तथा रोजगार मन्त्री गोकर्ण विष्टले सामाजिक न्यायसहितको समृद्धि प्राप्त गर्न सरकार नयाँ ढंगले अगाडि बढ्न चाहेको बताउनुभएको छ । मुसीकोट नगरपालिकाले बुधबार आयोजना गरेको कार्यक्रममा उहाँले कृषि, शिक्षा स्वास्थ्य, रोजगारीलगायतका सामाजिक विकासका क्षेत्रमा नयाँ ढंगले नीति तथा कार्यक्रम बनाइ जनताको सेवा गर्न चाहेको बताउनु भयो ।
विष्टले कुनै पनि व्यक्ति मन्त्री बन्दैमा जनताको जीवन बदलिन नसक्ने बताउँदै जीवन बदल्न नया ढंगले काम गर्नुपर्ने बताउनुभयो । ‘एक व्यक्ति मन्त्री हुँदैमा जनताको जीवन बदलिँदैन’ उहाँले भन्नुभयो, ‘जीवन बदल्न नयाँ ढंगले जीवन बदल्ने अभियान चलाउनु जरुरी छ ।’ उहाँले खान नपाएर भोकै बसिरहेका गरीब, दलित तथा पिछडिएका परिवारको विकासका निम्ति अब आधार तयार गर्ने बताउनुभयो ।
विश्व मानचित्रमा गौरवशाली, सबल र समृद्ध नेपाल बनाउने ऐतिहासिक दायित्व यो सरकारमा आएको भन्दै उहाँले सो दायित्व पूरा गर्न सरकार कुनै पनि कदम चाल्न पछि नपर्ने बताउनुभयो ।
‘हामीले पुरानो मानसिकता र मनोवृत्तिलाई सच्याएर पूर्वाधार निर्माण गर्दै गरिबी तथा बेरोजगारीलाई समाधान गर्न नयाँ ढंगले अगाडि बढ्नेछौं’ मन्त्री विष्टले भन्नुभयो, ‘जनताका तमाम समस्या समाधानका निम्ति निश्चित नयाँ नीति र कार्यक्रमका साथ अगाडि बढ्नेछौं ।’ सरकारले केही समयमै नीति तथा कार्यक्रम सार्वजनिक गर्ने पनि उहाँले बताउनुभयो ।
मन्त्री बिष्टले देशमा पर्याप्त रोजगारी सिर्जना हुने उल्लेख गर्नुभयो । ‘अब युवा अरबमा भेडा चराउन जानु पर्दैन’ उहाँले भन्नुभयो, ‘गाउँमै हजारौं’ रोजगारी सिर्जना गरी युवालाई देशमै काम लगाउँछौं ।’
मन्त्री विष्टले गुल्मीका दर्जनौ सडकको स्तरोन्नति गर्दै, प्रत्येक जनताको घरमा केन्द्रीय विद्युत्, हरेकको घरमा खानेपानीका धारा, खरका छाना हटाई सुरक्षित आवास दिन र किसानका खेतमा सिँचाइलगायतका व्यवस्था गर्न नयाँ ढंगले अगाडि बढ्न खोजिरहेको बताउनुभयो ।