Logo बैशाख ५, २०७८ आइतबार


‘एरेन्जरमा लुकेको गायकी ‘क्याप्टेन’मा झल्कियो’

जोसेफ शाही
काठमाडौं । लामो कपाल, गहुँगोरो वर्ण, हेर्दै मिलनसार अपरिचित व्यक्तिसँग अनामनगरस्थित रेकर्डिङ स्टुडियोमा भेट भयो । ६–७ वर्षअघि जीवनकै पहिलो गीत रेकर्डिङक्रममा संयोगवश भेटिएका अपरिचित व्यक्तिको नाम सुमन केसी रहेछ । पहिलो गीत रेकर्डिङकाक्रममा भेटिएका सुमनले बातचितमा भन्नुभयो, ‘एरेन्ज पनि गर्छु, भर्खर शुरु गरेको हँु ।’ सामान्य चिनजानपछि बेलामौकामा भेटघाट हुनथाल्यो । एरेन्जर भन्नेबित्तिकै स्वभाविकरुपमा केही सिर्जनशील कार्यमा सहकार्य गरौँ भन्ने लागिरहेको थियो ।

२०७१ को बीचतिर अस्थिर राजनीतिक खिचातानीले विरक्त लागेर आफैँले ‘राजनीतिको आगोभित्र पोलिदैँछ देश’ भन्ने गीत लेखेँ, संगीत पनि भरेँ । गीतमा संगीत संयोजन गर्न कसलाई दिने भन्ने मनमा खेलिरहँदा सुमन मानस्पटलमा आए । पहिलो गीतको संगीत संयोजनक्रममा वरिष्ठ संगीत संयोजकबाट अचाक्ली दुःख पाइसकेकाले साथीसँग काम गर्दा अलि सहज होला कि भनेर सुमनलाई भेटेँ । गीतको डमी दिएँ । गायनप्रतिको असीमित भोकले सायद सुमनजीले केही लाइन आफैँ गाएर गीत एरेन्ज गर्नुभएछ । गीतको शुरुको आलाप उहाँले आफ्नै शैलीमा यति मीठो गाइदिनुभएछ कि, हामीले उहाँले गाउनुभएकै शैलीलाई पछ्याएर गायौँ । त्यतिखेरै लागेको थियो कि यति मीठो गाउने मान्छे किन गीत एरेन्ज गरेर बसिरहेको छ ?

मनभित्र कौतुहलता हुँदाहँुदै पनि नसोधेको कुरा सोध्दा सुमनजीले सबै बेलिविस्तार सुनाउनुभयो । प्यूठानको तत्कालीन पुँजा गाविस जन्मिएका सुमन बाल्यकालदेखिनै गीत गाउनुहुन्थ्यो । स्कुलमा हुने कार्यक्रममा गीत गाउँदा साथीभाइ र शिक्षकशिक्षिकाबाट हौसला बटुलिन्थ्यो । किशोरावस्थामा प्रवेश गरेपछि उहाँको पातलो मिठो आवाज एकैचोटि मोटो धोद्रो सुनिन थाल्यो । त्यसको चिन्ता सुमन केसीलाई छँदैथियो, त्यो भन्दा बढी चिन्ता उहाँको हजुरआमालाई भएछ, आवाज धोद्रो भयो, भोलि नातिले मीठो गीत गाउन सक्ला कि नसक्ला भन्ने चिन्ताले हजुरआमालाई पिरोलेछ ।

दिन बित्दै जाँदा गायक बन्ने सपना बोकेर प्यूठानबाट काठमाडौं छिरेका सुमनको शुरुको गायन यात्रा सोचेजस्तो हुनसकेन । काठमाडौंको महँगो बसाई त्यसमाथि शुरुमै स्टुडियोमा गीत रेकर्ड गर्न त्यति सहज नलागेपछि उहाँ संगीत सिक्दै विस्तारै संंगीत संयोजन गर्न थाल्नुभएछ । केही समय रेकर्डिस्टका रुपमा काम गरेपछि विस्तारै संगीत संयोजनमा व्यस्त हुन थाल्नुभयो । संगीत संयोजन गर्ने गीतमा आफैँ डमी हाल्दिँदा उहाँको आवाज मन पराउने संगीतकर्मीको जमात बढ्दै गयो । संगीत संयोजन गर्दा उहाँ आर्थिकरुपमा पनि सबल बन्दै जानुभयो र गीत गाउँदा ध्यान दिनुपर्ने प्राविधिक पाटो पनि ज्ञान हुँदा उहाँको गायकी थप निखारिँदै गयो । शुरुमै गायनमा नलागेर संगीत संयोजनमा लाग्दा पछुतो छैन सुमनलाई ।

त्यसयता उहाँसँग दर्जन बढी गीतमा काम गरिसकेँ । केही गीत सुमनसँगै गाएको छु । एउटा रमाइलो प्रसंग के छ भने, एक दिन सुमनसँगै हुँदा आँखा अकस्मात मेरो मोबाइलमा परे । उहाँको नाम एरेन्जर सुमन भनेर सेभ गरेको थिएँ । उहाँले हाँस्दै भन्नुभयो, ‘सरजी अब छिट्टै तपाईंले सिङ्गर सुमन लेखेर सेभ गर्नुहुन्छ ।’ उहाँको गायनप्रतिको असीमित झुकाव र समर्पण त्यतिखेर पनि अनुभूत भएको थियो ।

पछिल्लो २–३ वर्षयता सुमनको आवाजमा निकै मन छुने गीत बजारमा आएका छन् । सुमनजीले मेलिना राईसँग गाउनुभएको युगल गीत ‘मखमली चोली’ सर्वाधिक रुचाइएको गीत हो । यही गीतबाट उहाँले वर्षकै उत्कृष्ट गीत टाइटलमा कालिका अवार्ड जित्नुभयो । उहाँको आवाजमै रहेको ‘आदत बन्यौ’ तिमी सुनिरहँु झँै लाग्छ । यस्ता दर्जन बढी गीत गाइसकेका सुमनलाई अनमोल केसी अभिनित क्याप्टेन फिल्मको गीत ‘सक्दिनँ कि बाँच्न’ले प्ले ब्याक सिङ्गिङमा स्थापित गरिदिएको छ ।

क्याप्टेन फिल्ममा गीत गाउने अवसर कसरी जुर्यो भन्ने जिज्ञासामा सुमनजीले भन्नुभयो, ‘क्याप्टेनका निर्देशक दीवाकर भट्टराई र संगीतकार अर्जुन पोखरेलबीच कुरा हँुदा निर्देशकज्यूले मेरो आवाज मन पराउनु भएछ । प्रतिष्ठित ब्यानरको चलचित्रमा गाउने अवसर मिल्यो भनेर फोन आउँदा सरप्राइज भयो ।’ अहिले क्याप्टेनको गीत चौतर्फी रुचाइएको छ । अन्य चलचित्रमा पनि उहाँको आवाजमा गीत आउने क्रममा छन् । अहिले सुमन केसीको ‘मखमली आवाज’ सुनेर मन्त्रमुग्ध हुनेहरुको जमात अस्वाभाविकरुपमा बढ्दै गएको छ ।

प्रतिक्रिया दिनुहोस्
विशेष

काठमाडौं । वर्तमान सरकारमा सहभागि हुने या नयाँ गठबन्धन निर्माण गरी अघि बढ्ने भन्ने दोधारमा रहेको जनता समाजवादी पार्टी (जसपा)…

हाल देशको पहाडी भूभागमा आंशिकदेखि सामान्य बदली रही बाँकी भूभागमा आंशिक बदलीको अबस्था रहेको महाशाखाको भनाइ छ।

बोली वचनले साथ दिनेछ। आफन्त भेटघाट हुनेछ। धनको कारोबार बढ्नेछ।

नेकपा एमालेका अध्यक्ष केपी शर्मा ओलीको गृह जिल्ला झापामा एमालेकै वरिष्ठ नेताद्वय झलनाथ खनाल र माधव नेपालसमूहले पार्टी पुनर्गठन गरेको…

३ वटा सुरुङहरु निर्माण गर्नुपर्ने भएकाले नेपालको सन्दर्भमा नयाँ काम चुनौतिपूर्ण छ ।

तनहूँ जिल्लाको नाम तनहूँसुरबाट अप्रभंश भएर रहेको भन्ने किंवदन्ती छ ।