Logo फाल्गुन १८, २०७७ मंगलबार


जनता समाचारमा आइतवार प्रकाशित समाचार सार

जनतासमाचार डट्कममा आज (आइतवार) प्रकाशित समाचारका मुख्य अंशहरू :

१.संविधानविद् भीमार्जुन आचार्य र वरिष्ठ अधिवक्ता सुनीलकुमार पोख्रेलले प्रतिनिधिसभाले प्रधानमन्त्री दिनसक्ने अवस्था रहेसम्म विघटन गर्न नपाउने दाबी गर्नुभएको छ । प्रतिनिधिसभा विघटनविरुद्धको रिटमाथि आजको सुनुवाइमा बहस गर्दै उहाँहरुले प्रतिनिधि सभा विघटन असंवैधानिक भएको जिकिर गर्नुभएको हो । प्रतिनिधिसभाले प्रधानमन्त्री दिनसक्ने अवस्था रहेसम्म विघटन गर्न नपाउने उहाँहरुले जिकिर गर्नुभएको छ ।

 २.नेपाल कम्युनिष्ट पार्टी (नेकपा) का वरिष्ठ नेता झलनाथ खनालले केपी शर्मा ओलीले पूर्वराजा ज्ञानेन्द्र र मण्डले पथ अवलम्बन गरेको बताउनुभएको छ । अनेरास्ववियुले आइतबार काठमाडौंमा आयोजना गरेको भेलामा सम्बोधन गर्दै नेता खनालले प्रधानमन्त्री ओलीले संविधानको मर्म विपरित प्रतिनिधिसभा विघटन गरेर पूर्वराजा ज्ञानेन्द्र र मण्डलेले लिएको बाटो समातेको टिप्पणी गर्नुभएको हो । ओलीको कदमका कारण मुलुक अन्धकारतर्फ उन्मुख भएको उहाँको भनाइ थियो ।

३.गृहमन्त्री रामबहादुर थापाले संसद् पुनर्स्थापना हुनु भनेको प्रतिगमन हुँदै राजसंस्था स्थापनातर्फ लाग्नु भएको बताउनु भएको छ । नेकपाले आज धनकुटामा आयोजना गरेको कार्यकर्ता भेलालाई सम्बोधन गर्दै गृहमन्त्री थापाले अब निर्वाचनका लागि सबै तयार हुनुपर्ने बताउनु भएको हो ।

४.अधिवक्ता सन्ताेष भण्डारीले प्रतिनिधिसभा विघटन गर्ने अधिकार प्रधानमन्त्रीलाई  नभएकाे बताउनुभएकाे छ । प्रतिनिधि सभा विघटनविरुद्ध परेको रिट निवेदनबमोजिम आइतवार संवैधानिक इजलासमा भएको सुनुवाइमा रिट निवेदकका तर्फबाट अधिवक्ता भण्डारीले प्रतिनिधिसभाको कार्यकाल पाँच वर्षका लागि भएकाले प्रधानमन्त्रीलाई विघटन गर्ने अधिकार नभएको बताउनुभएको हाे ।

५.नेपाल कम्युनिष्ट पार्टी (नेकपा) का अध्यक्ष पुष्पकमल दाहालले संविधान र देशको तनाव भइरहँदा आफू हाँस्न नसक्ने बताउनुभएको छ । नेकपाको भातृ संगठन राष्ट्रिय युवा संघ नेपाल, केन्द्रीय कमिटीको दाेस्रो पूर्ण बैठकलाई सम्बोधन गर्दै दाहालले संविधानको हत्या हुँदा हाँस्न नसक्ने बताउनुभएको हो ।

६.नेपाल कम्युनिष्ट पार्टी (नेकपा) का अध्यक्ष माधवकुमार नेपालले प्रधानमन्त्री केपी ओलीकै कारण पार्टीमा विग्रह आएको र सडकमा आउनु परेको बताउनुभएको छ । जिल्ला भेलालाई सम्बोधन गर्न बाँके आइपुग्नुभएका नेता नेपालले आम कार्यकर्ता र नेताहरुलाई ओलीको प्रगिमनकाविरुद्ध सडकमा आउनु परेको खण्डमा तयार रहन आव्हान गर्नुभएको हो ।

७.निर्वाचन आयोगले सर्वदलीय छलफलका लागि सबै दलको प्रतिनिधि आयोगमा बोलाएको छ । सरकारले घोषणा गरेको मध्यावधि निर्वाचनका बारेमा छलफल गर्न सबै दलका दुई दुई जना प्रतिनिधि पठाइदिन आयोगले सबै दलमा पत्राचार गरेको छ ।

८.नेपाली कांग्रेसका वरिष्ठ नेता रामचन्द्र पौडेलले लोकतन्त्रको संरक्षणका लागि सबै एक हुनुपर्ने बताउनुभएको छ । कांग्रेस चितवन क्षेत्र नम्वर २ ले प्रजातन्त्रका सेनानी कांग्रेसका पूर्वक्षेत्रीय सभापति भक्तिप्रसाद तिमिल्सिनाको सातौँ पुण्यतिथिका दिन आइतवार आयोजित श्रद्धाञ्जलिसभामा उहाँले सबैको एकता र लगनशीलताले मात्र लोकतन्त्र र संविधानको रक्षा गर्न सकिने स्पष्ट गर्नुभयो।

९.प्रतिनिधिसभा विघटनविरुद्ध सर्वोच्च अदालतमा दर्ता भएका रिट निवेदनमाथि संवैधानिक इजलासमा आइतबारदेखि निरन्तर सुनुवाइ हुने भएको छ । प्रधानन्यायाधीश चोलेन्द्रशम्शेर जबरा तथा न्यायाधीश विश्वम्भरप्रसाद श्रेष्ठ, अनिलकुमार सिन्हा, सपना मल्ल र तेजबहादुर केसीको संवैधानिक इजलासले शुक्रबार संवैधानिक इजलासमै सुनुवाइ गर्ने तय गरेपछि आइतबारबाट विषयवस्तुमा प्रवेश गरेर बहस शुुरु हुनेछ ।

१०.यतिबेला २०७६ को साउन ४ गते धुलिखेलको एक कार्यक्रममा संसद विघटनबारे संवैधानिक व्यवस्था नरहेको बताएका संविधानसभाका अध्यक्ष सुवास नेम्वाङको भिडियो सामाजिक सञ्जालमा व्यापक बनेको छ । भिडियो ‘भाइरल’ नबनोस् पनि कसरी ? उतिबेला संसद विघटनबारे संविधानमा व्यवस्था नै नभएको बताएका नेम्वाङ आज आफ्नै भनाइको खण्डन हुने गरी संसद विघटनका कडा पक्षपाती बनेर निस्किएका छन् ।

११.काठमाडाैं उपत्यकाका धेरैजसो विद्यालयमा आजदेखि भौतिक रुपमै उपस्थित भएर पठनपाठन सुरु हुने भएको छ । कोरोनाको जोखिम कम भएको भन्दै पालिकाहरुले विद्यालय खोल्न अनुमति दिएसँगै विद्यालयहरुले विद्यार्थीलाई भौतिक रुपमै उपस्थित गराएर पढाइ सुरु गर्न लागेका हुन् ।

१२.नेपालको आरोहण टोलीले विश्वको दोस्रो अग्लो शिखर माउन्ट केटुको सफल आरोहण गरेका छन् । ८ हजार ६ सय ११ फिट उचाइ रहेको छोगोरी समेत भनिने केटु पर्वत पाकिस्तान र चीनको सीमामा अवस्थित छ । नेपालका छाङदावा शेर्पा नेतृत्वको आरोही टोली पहिलोपटक केटु पर्वत आरोहण गरेर कीर्तिमान राख्न सफल भएको हो । टोलीमा १० सदस्य रहेका थिए । शेर्पाको टोली शनिवार स्थानीय समय अनुसार साँझ ५ बजे केटु पर्वतको शिखरमा पुग्न सफल भएको थियो ।

१३.भारतमा कोरोनाभाइरस विरुद्धको खोप अभियान शुरु भएको छ । शनिबार पहिलो दिन नै करिब दुई लाख जनाले खोप लगाएका छन् । त्यहाँको केन्द्रिय स्वास्थ्य मन्त्रालयले पहिलो दिन एक लाख ९१ हजारभन्दा बढीले खोप लगाएको जनाएको छ । पहिलो दिन खोप लगाउन तीन हजार ३५१ शिविर चलाइएको थियो । नयाँ दिल्लीस्थित अखिल भारतीय आयुर्विज्ञान संस्थान (एम्स) का सफाइ कर्मचारी मनीष कुमारलाई पहिलो खोप दिइएको थियो ।

१४.परापूर्वकालदेखि नै मानिसहरुले दैनिक जीवनमा काठको उपयोग गर्दै आएका छन् । पुराना मठमन्दिर र त्यसमा कलात्मक ढंगबाट कुँदिएकासुन्दर काष्ठ कलाहरु त्यसका बलिया उदाहरण हुन् । घरमा प्रयोग हुने अधिकांश वस्तु जस्तै झ्याल ढोका, चौकोस आदि काठकै बनाइन्छ ।

१५. प्रतिनिधिसभा विघटनविरुद्ध सर्वोच्च अदालतमा दर्ता भएका रिट निवेदनमाथि संवैधानिक इजलासमा पुन: सुनुवाइ सुरु भएको छ । प्रधानन्यायाधीश चोलेन्द्रशम्शेर जबरा तथा न्यायाधीश विश्वम्भरप्रसाद श्रेष्ठ, अनिलकुमार सिन्हा, सपना मल्ल र तेजबहादुर केसीको संवैधानिक इजलासले शुक्रबार संवैधानिक इजलासमै सुनुवाइ गर्ने तय गरेपछि आइतबारबाट विषयवस्तुमा प्रवेश गरेर बहस सुरु भएको हो ।

१६.कोभिड १९ को कारण गत चैत्र ११ गतेदेखि बन्द रहेका काठमाडौंं महानगरपालिका भित्रका विद्यालय आइतबारदेखि खुलेका छन् । कोभिड १९ संक्रमणको कारण गत चैत्र ११ गतेदेखि लकडाउन भएपछि बन्द रहेका काठमाडौं महानगरपालिका भित्रका विद्यालयमा आइतबारदेखि भौतिक रुपमै उपस्थित भई विद्यालय सञ्चालन भएका हुन् ।

१७.काेराेनाविरूद्धकाे खाेप लगाएका ५२ जना भारतीयकाे स्वास्थ्यमा समस्या देखिएकाे छ । शनिवारबाट शुरू गरिएकाे काेराेनाविरूद्धकाे खाेप लगाएका ५२ जनाकाे स्वास्थ्यमा समस्या देखिएकाे हाे । समस्या देखिएका मध्ये एक जनाकाे अवस्था गम्भीर रहेकाे भारतीय समाचार माध्यमहरूले जनाएका छन् ।

१८.कैलाली टीकापुरकी रुपा ओलीका दुई सन्तान छन् । रुपाका छोरा १६ र छोरी १४ वर्षका छन् । उनका श्रीमान् वैदेशिक रोजगारीका सिलसिलामा संयुक्त अरब इमिरेट्सको शहर दुबइमा रहेका छन् । निजी विद्यालयकी शिक्षिका रुपाले छोराछोरी दुवैलाई घरमा गर्नुपर्ने काममा समान व्यवहार गरिरहेकी छिन् ।

१९.आजको समयमा पनि साँझ पर्न थालेपछि हामीलाई भूतको डर लाग्न थाल्छ । बोली नफुट्दै, कुरा बुझ्न नथाल्दै, खुट्टाले आफ्नै ज्यान थाम्ने नहुँदै हामीलाई डर देखाउनु पर्दा ‘भूत आयो भूत’ भन्ने गरियो । त्यहि बेलादेखि भूत भन्ने कुनै डरलाग्दो मान्छे, जनावर वा कुनै चिज होला भन्ने छाप हाम्रो दिमागमा हाम्रौ घर परिवारबाट छापिदियो । परिणाम फिल्ममा, टेलिभिजनमा, तस्बिरमा बाहेक वास्तविक जीवनमा कहल्यिै नदेखेको भूतसँग हामीलाई सँधै डर लागिरह्यो ।

२०.सरकारले पूर्व उद्योग वाणिज्य तथा आपूर्ति राज्यमन्त्री मोतीलाल दुगडलाई विशेष आर्थिक सल्लाहकारमा नियुक्त गरेको छ । सरकारले मन्त्रीसरहको मर्यादा कायम गर्ने गरी दुगडलाई प्रधानमन्त्रीको विशेष आर्थिक सल्लाहकार (अवैतनिक) पदमा नियुक्त गरेको हो ।

२१.राजधानीमा जारी प्रधानमन्त्री कप पुरुष राष्ट्रिय क्रिकेट प्रतियोगितामा आइतबार विभागीय टोली त्रिभुवन आर्मी क्लब र बाग्मती प्रदेशले जित निकालेका छन् । मूलपानी क्रिकेट मैदानमा भएको खेलमा विभागीय टोली आर्मीले कर्णाली प्रदेशमाथि ८० रनको फराकिलो जित निकाल्दा जारी प्रतियोगितामा लगातार दोस्रो जित निकालेको हो ।

२२. नेपाल राष्ट्र बैंकले नाडेप लघुवित्त वित्तीय संस्थाका सञ्चालक समितिका अध्यक्षसहित ६ जना र प्रमुख कार्यकारी अधिकृतलाई कारबाही गरेको छ । लाखौं रुपैयाँको आर्थिक अनियमितता गरेको र व्यवस्थापन चुस्त दुरुस्त पार्न नसकेको भन्दै संस्थाका संचालक एवं व्यवस्थापन समूहका पदाधिकारी कारबाहीमा परेका हुन् ।

२३. इलाम नगरपालिकाले सामुदायिक विद्यालयका छात्राहरुलाई निःशुल्क रुपमा सेनेटरी प्याड वितरण गरिरहेको छ । महिनावारी भएको समयमा पनि विद्यालयमा छात्राहरु विद्यालय जानबाट बञ्चित नहुन भनेर नगरपालिकाले सेनेटरी प्याड वितरण गरेको हो ।

२४.जीपको ठक्करबाट १३ वर्षीया बालिकाको मृत्यु भएको छ । पुनर्वास नगरपालिका–१, बलभद्रबस्ती सुकुम्बासी शिविर बस्ने दिलु सार्कीको १३ वर्षीया छोरी सुस्मिता सार्कीलाई जीपले ठक्कर दिँदा उनकाे मृत्यु भएको हो। धनगढीदेखि बेलौरी जान लागेको को १ च ८२७८ नम्बरको बोलेरो जीपले बालिकालाई ठक्कर दिएको प्रहरीले जनाएको छ ।

२५. विश्व स्वास्थ्य सङ्गठन डब्ल्युएचओले नयाँ प्रजातिको कोरोना भाइरसको संक्रमणले सन् २०२१ झन् कष्टकर हुने चेतावनी दिएको छ । कोरोनाभाइरसको नयाँ प्रकार पहिलोभन्दा धेरै संक्रामक रहेको र छिटो फैलिरहेकाले यसले विश्वमा सन् २०२० भन्दा कठिन अवस्था ल्याउन सक्ने डब्ल्युएचओले चेतावनी दिएको हो । पहिलोपटक बेलायतमा देखिएको नयाँ प्रकारको कोरोना भाइरस ५० वटा देश र क्षेत्रहरूमा फैलिसकेको छ ।

 

प्रतिक्रिया दिनुहोस्
विशेष

नरेश न्यौपाने/टिप्पणी काठमाडौं । हुन त राजनीतिलाई विचित्रको खेल त्यसै कहाँ भनिएको हो र ? बेला बेला राजनीतिकर्मीहरुले गर्ने व्यक्तिगत…

हाल प्रदेश १ मा आंशिकदेखि सामान्य बदली रही अन्य पहाडी भूभागहरुमा आंशिक बदली रहेको महाशाखाको भनाइ छ।

खानपिनमा खर्च हुनेछ। पूरानो धन जम्मा हुनेछ। बाेलीले साथ दिनेछ।

मन्त्री गुरुङले प्रधानमन्त्री ओली नैतिकताको हिसाबले पनि राजीनामा गरेर भाग्न नपाउने तर्क गर्नुभयो ।

मन्त्रिपरिषदले गरेको सिफारिस अनुसार राष्ट्रपति भण्डारीले २३ गते आइतबार ४ बजेका लागि प्रतिनिधिसभाको बैठक आह्वान गर्नुभएको छ ।

आफू हरेक परिस्थितिको सामना गर्न पूर्ण रुपमा तयार रहेको तथा आफ्नो स्वभाव, आचरण पूर्ण लोकतान्त्रिक भएको उहाँकाे दाबी छ।