Logo बैशाख २८, २०७८ मंगलबार


मन हराएको सुचना

निशान निष्कर्ष

सम्पादकज्यू !

छापिदिनुस् तपाईँको अखबारको पहिलो पानामा
मेरो मन हराएको सुचना ।

कता जान्छ होला यति धेरै धुँवाको मुस्लो ?
कि कतार र दुवइमा
अर्को मृत्युको खोजीमा निस्किन्छ ?
कि मलेसियाको जंगलको भेडीगोठमा
जान्छ पिरती गाँस्न ?
कि अमेरिका र अष्ट्रेलियाको
मसाज सेन्टर पस्छ ?

पक्कै पनि सिमाना काटेको हुनुपर्छ
सरकारले उतै जाने आदेश दिएपछि ।
ब्रह्मनालको छेउमा उभिएर यही सोच्दै थिएँ

म भर्खर आर्यघाटबाट फर्केको हुँ
जलाएर सत्यताको चाँङ

मैले बिसाएको मन पनि उतै छुट्यो कि ?

हातमा १७ वर्षे लगानीको धितोपत्र बोकेर
हिँडिरहेँ सहरका कुनाकुनामा डलर कोरलिरहेका
आइएनजिओ र एनजिओ भेट्न
फाटिरहे आमाको सपना
बुबाको विश्वास र प्रेमिकाको आशा ।
चढाइरहेँ स्वाभिमानको आहूति
तर पनि मनले मनलाई नजितेपछि
त्यतै छुटेछ क्यारे मन

सम्पादकज्यू,
यति खबर त छापिदिनुहुन्छ होला नि ।

नयाँ बानेश्वरस्थित सहरभित्रको पार्कमा जम्मा भएका
एक हूल युग
नियालिरहन्छन् सहरको सरम
गाइरहन्छन्, रिमालका कविताहरु
देखिरहन्छन् बि आइ सि सिमा आमाका सपनाहरु ।
उनीहरु कति सत्य छन्
मेरो मनले नियाल्न नसकेरै
भागेको हुनुपर्छ मन
कोटेश्वरको चोकबाट कुनै बाटो ।

सपना बाँड्न जति सजिलो छ नि
त्यति गाह्रो रहेछ संघर्ष गर्न ।

हजारौँ निर्दोष इन्द्रमायाहरुको छोटिएको लुगामा मात्र
किन बस्छ आजकाल रमेशहरुको मन
र देख्छन् उनीहरुलाई सन्नी लियोनी

स्वतन्त्र हुनु अपराध हो र ?

उता सुदूर बस्तीहरुको
छाउगोठमा आफ्नो कौमार्य सेलाइरहेका
सालिन सुशीलाहरु पीडाको सुस्केराभित्र
कहिले पाउलान् परिवर्तनको आभाष
मैया बादीहरुले कहिले बनाउलान्
आफ्नै संविधान ?

सम्पादकज्यू,
मनले यस्तै सोचिरहन्छ आजकाल र
बस्मा छैन मन ।

मैले सफलताको शीतल सुस्केरा हाल्न
फर्किनु थियो गाउँ र गाउनु थियो एकताको गीत

यति जान्दाजान्दै पनि किन पाउँदिन
मेरो मन आफैसँग ?

सम्पादकज्यू,
देशप्रतिको थोरै मायालाई सम्झेरै भए पनि
अब त छाप्नुहुन्छ नि हैन ?
मेरो मन हराएको सुचना ।

प्रतिक्रिया दिनुहोस्
विशेष

देशका केही स्थानमा मेघगर्जन, चट्याङ्ग र हावाहुरीसहित हल्कादेखि मध्यम वर्षा हुने महाशाखाको पूर्वानुमान रहेको छ।

मन्त्रालयका प्रमुख विशेषज्ञ डा रोशन पोखरेलले एक महिनामा एक लाख २८ हजार सङ्क्रमित बढेको जानकारी दिँदै सबैको प्रयासबाट नै सङ्क्रमण…

आज (मंगलबार) अस्पतालले प्रेस विज्ञप्ति जारी गरी दिएको जानकारी अनुसार पूर्वराजा शाहको २ दिनअघि पुनः स्वाब परीक्षण गरिएको र त्यसको…

प्रयोगशालाका लागि आवश्यक सामग्रीको अभावमा अस्पतालले परीक्षण रोकेको अस्पताल प्रशासन स्रोतले जानकारी दिएकाे छ ।

 बैठकले राष्ट्रिय प्राथमिकताप्राप्त विकास आयोजना बाहेकका सबै निर्माण कार्य पनि रोक्ने निर्णय गरेको छ । साथै अबको निषेधाज्ञा  थप कडा…

सहभागी प्रशिक्षार्थीहरुमा डेनमार्क, बेल्जियम, स्पेन, स्वीडेनलगायतका युरोपेली मुलुकमा रोजगारी तथा अध्ययनमा रहेका १८ युवा रहेको क्षेत्रीय सञ्चार स्रोत केन्द्र विराटनगरका…