Logo बैशाख २९, २०७८ बुधबार


राष्ट्रपति र प्रधानमन्त्रीकाे सन्देश : संसद फेरि पनि जिउँदो नरहन सक्छ

काठमाडौं । राष्ट्रपति विद्यादेवी भण्डारीले बोलाउनुभएको मंगलवारको सर्वदलीय बैठकले संसद फेरि पनि जिउँदो नरहन सक्ने सन्देश प्रवाह गरेको छ । राष्ट्रपतिले ‘कोभिड– १९ पछि सामूहिक छलफल नभएको र आफू बंगलादेशको भ्रमणमा जान लागेकोले सर्वदलीय बैठक बोलाएको बताउनु भएपनि बैठकमा राष्ट्रपति र प्रधानमन्त्री केपी शर्मा ओलीले राख्नुभएका भनाइहरुले संसद फेरि पनि जिउँदो नरहन सक्ने सन्देश दिएको हो ।

राष्ट्रपतिले शिक्षा, स्वास्थ्य र जलवायु परिवर्तनको विषयमा छलफल गर्ने बेला आएको र त्यसैका लागि आफू बंगलादेश जान लागेकोले सल्लाह गर्न बैठक बोलाएको बताउनु भए पनि नेताहरुले संसदको असंवैधानिक विघटन, सरकारले पुन:स्थापित संसदलाई बिजनेस नदिएको विषय र प्रधानमन्त्रीले अविश्वासको प्रस्ताव फेस गर्ने या नगर्नेबारे के सोच छ ? जस्ता जिज्ञासा राखेका थिए ।

बैठकमा सहभागि नेताहरुका अनुसार सर्वोच्च अदालतले वैकल्पिक सरकार निर्माणको जिम्मेवारी र अधिकार संसद्को भनेर थप प्रस्ट पारेको तर संसद्ले सार्वभौम अधिकार अभ्यास गर्न नपाउँदै फेरि विघटन गर्ने कोणबाट प्रधानमन्त्री केपी शर्मा ओलीले संसदमा राय राखेको बताएका छन् । नेताहरुले ओलीले संसदले काम गर्ने अवस्था नभएको र फेरि पनि निर्वाचनको विकल्प नभएको बताएपछि राष्ट्रपतिले ओलीकै भनाइसँग मेल खाने गरी ‘लोकतन्त्रमा चुनाव स्वाभाविक हो । यसलाई नकारात्मक रूपमा लिनुहुँदैन’ भन्नुले सार्वभौम संसदको फेरि पनि हत्या हुनसक्ने सम्भावना बढेको आशंका गरेका छन् ।

स्रोतका अनुसार सर्वदलीय बैठकमा कांग्रेस सभापति शेरबहादुर देउवाले राष्ट्रपतिलाई बंगलादेश भ्रमणका लागि शुभकामना मात्रै दिनु भएको थियो । तर वरिष्ठ नेता रामचन्द्र पौडेलले भने ‘संविधान र लोकतन्त्रमाथि प्रहार हुने गरी संसद् विघटन गर्दा यस्तो छलफल गर्नुभएन । अहिले यो छलफलको के अर्थ ? संसद् पुन:स्थापना भएको छ, अब अहिले अरू विषयमा के सल्लाह चाहियो ? के परामर्श चाहियो ?’ भन्दै सर्वदलीय बैठकको औचित्यतामाथि नै प्रश्न उठाउनुभएको थियो । पौडेलको प्रश्नमा राष्ट्रपतिको जवाफ थियो, ‘मैले त संविधानअनुसार सरकारले गरेको सिफारिस कार्यान्वयन गर्ने हो, आफ्नो निर्णय गरेको होइन । संविधानको मैले संरक्षण गरेकी हुँ ।

बैठकमा उपस्थित माओवादी केन्द्रका अध्यक्ष पुष्पकमल दाहाल ‘प्रचण्ड’ ले बैठकले छलफलको विषयभन्दा बाहिर प्रवेश गरेको बताउँदै जे विषयका लागि बैठक बोलाइएको थियो र जे विषयमा छलफल भयो त्यसमा तालमेल नमिलेको बताउनु भएको थियो । ‘प्रधानमन्त्रीले जसरी सुरु गर्नुभयो, छलफल मलाई ठिक लागेन । छलफल अनुचित, अप्रिय र अनुपयुक्त लाग्यो । म धेरै छलफल गर्न चाहन्न । यो अनावश्यक विषयमा बहस गर्ने थलो होइन ’ प्रचण्डको भनाइ थियो ।

पुन:स्थापनापछि संसद प्रभावकारी भएन: प्रधानमन्त्री

प्रधानमन्त्री केपी शर्मा ओलीले सर्वोच्चबाट संसद् पुन:स्थापनाको फैसला हुनु सर्वोच्चको निर्णय भएको तर, संविधानमा संसद् विघटन गर्ने प्रावधान त छ नि ? भन्दै आफ्नो कदमको बचाउ गर्नुभएको थियो ।

‘लोकतन्त्रमा चुनावबाट किन डराउने ? अहिले नभए पनि २ वर्षपछि त चुनाव हुन्छ नि  ? संसद् पुन:स्थापनापछि यसले प्रभावकारी काम गर्न सकेको छैन । काम गर्ने अवस्था पनि छैन । परिणाममुखी नहुने संसद्तिर फर्कनुभन्दा सबै मिलेर चुनावतिर लागौँ ’ प्रधानमन्त्रीको भनाइ थियो ।

ओलीले यसरी फेरि ताजा जनादेशको बाटोमा जानुपर्ने कुरा गर्नु भएपछि कांग्रेस नेता पौडेल पुनः कड्किनुभएको थियो । पौडेलको ओलीलाई प्रश्न थियो ‘फेरि चुनाव गरेर आएको अर्को संसद् पनि यस्तो हुँदैन भनेर कसले ग्यारेन्टी लिन सक्छ ?’

 

प्रतिक्रिया दिनुहोस्
विशेष

‘अस्पतालमा बेड र अक्सिजनको चर्को अभाव छ, दुःख सहेरै भएपनि यो ३ हप्ता घरभित्रै बसौं, जीवनको तुलनामा दुःख सानो हो…

‘सहयोग गर्ने सपना अधुरै रह्यो तर म आफ्नो रिपोर्ट नेगेटिभ आउने र शरीर स्वस्थ्य हुने दिन कुरिरहेकी छु । जुन…

बुधवार बिहानसम्म विश्व स्वास्थ्य संगठनले दिएको तत्थ्यांक अनुसार ३३ लाख ३० हजार ३४३ जनाको कोरोना संक्रमणबाट ज्यान गइसकेको छ ।

देशका केही स्थानमा मेघगर्जन, चट्याङ्ग र हावाहुरीसहित हल्कादेखि मध्यम वर्षा हुने महाशाखाको पूर्वानुमान रहेको छ।

मन्त्रालयका प्रमुख विशेषज्ञ डा रोशन पोखरेलले एक महिनामा एक लाख २८ हजार सङ्क्रमित बढेको जानकारी दिँदै सबैको प्रयासबाट नै सङ्क्रमण…

आज (मंगलबार) अस्पतालले प्रेस विज्ञप्ति जारी गरी दिएको जानकारी अनुसार पूर्वराजा शाहको २ दिनअघि पुनः स्वाब परीक्षण गरिएको र त्यसको…