सनिउल्ला धोबी
कपिलवस्तु । शिवराज नगरपालिकाले रोजगार सेवा केन्द्रका लागि रोजगार सहायक भर्नामा चुकेको छ । खुल्ला प्रतिस्पर्धा मार्फत करार माध्यमबाट पदपूर्तिका लागि शिवराज नगरपालिकाले मिति २०७९ असार २७ गते रोजगार सहायक भर्नाका लागि सूचना प्रकाशित गरेकाे थियाे ।
सूचनामा दरखास्तमा दिने अन्तिम म्याद मिति २०७९ साउन ९ गते तोकियो । पालिकाले साउन ९ गते बिदा परे त्यसको अर्को दिनसम्म दरखास्त दिन सकिने सूचनामा उल्लेख गर्यो ।
त्यसपछि साउन २५ गते प्रारम्भिक योग्यताको सूचना प्रकाशित गर्यो । नगरपालिकाले सो सूचनामा १० जनाको नाम सहित समावेश गरेको थियो ।
शिवराज नगरपालिकाले स्थानीय तहमा प्राविधिक सहायक र रोजगार सहायक पदपूर्ति सम्बन्धी मापदण्ड २०७८ अनुसार नै प्रारम्भिक योग्यता क्रमको सूची प्रकाशन गर्यो । तर शिवराज नगरपालिकाले नै निर्माण गरेको स्थानीय तहमा प्राविधिक सहायक र रोजगार सहायक पदपूर्ति सम्बन्धी मापदण्ड २०७८ को धज्जि उडाउदै ६ दिन ढिलो सूचना प्रकाशन गरेको छ ।
नगरपालिकाले स्थानीय तहमा प्राविधिक सहायक र रोजगार सहायक पदपूर्ति सम्बन्धि मापदण्ड २०७८ को बेवास्ता गर्दै प्रक्रिया अगाडि बढाएको स्थानीयले आरोप लगाएका छन् । मापदण्डमा १० दिन भित्रै सूची प्रकाशित गर्नु पर्छ भनेर स्पष्ट लेखिए पनि शिवराज नगरपालिकाले ६ दिन ढिलो सूचना प्रकासन गरी चुकेको छ ।
दरबन्दी र पदपूर्ति सम्बन्धी प्रारम्भिक योग्यता क्रमको सूची प्रकशन गर्न बनेको बमोजिम दफा नं ५ को उपदफा (१) बमोजिमको सूचनामा तोकिएको म्यादभित्र प्रप्त हुन आएका आबेदन मध्येबाट पदपूर्ति समितिले म्याद समाप्त भएको १० दिन भित्र योग्य ठहरिएका मध्येबाट १० जना र नभएमा उपलब्ध संख्याका उम्मेदवारको प्रारम्भिक योग्यताक्रम सूची प्रकाशन गर्ने उल्लेख गरिएको छ ।
तत्कालीन प्रमुख प्रशाकीय अधिकृत गणेशप्रसाद अर्यालले हस्ताक्षर गरेको सूचनामा मापदण्डको ख्यालै नगरी सूचना प्रकाशित गरिएको छ । १० दिन भित्रै प्रकाशन हुनु पर्न सूचना ६ दिन ढिलो प्रकाशित भएको प्रति शिवराज नगरवासी आशंका व्यक्त गरेका छन् ।
दरखास्त दिएकाहरुले सूचना ढिलो प्रकाशित गरेको कार्य गम्भीर विषय भएको बताएका छन् । दरखास्त दिएका एकजनाले नाम नबताउने सर्तमा नगरपालिका भित्र आन्तरिक चलखेल भएको बताए । उक्त सूचना केही जनप्रतिनिधिको आसेपासेको लागि खुलाएको भन्ने आंशका व्यक्त गरे । उनले भने "सूचना ढिलो आयो यो दुखद् पक्ष हो, कस्को सेटिङ्गमा यस्तो भयो ?"
उक्त रोजगार सहायकको लिखत परीक्षा अझैसम्म भएको छैन ।
शिवराज नगरपालिकाका तत्कालीन प्रमुख प्रशाकीय गणेश अर्यालको सरुवा भइ स्याङ्जाको पुतलीबजार नगरपालिका गइसकेका छन् ।
