काठमाडौं । आगामी असार ८ गते रिलिज मिति तोक्दै फिल्म ‘अन्तिम संस्कार’ को फस्ट लुक सार्वजनिक गरिएको छ ।
फस्ट लुकमा फिल्मका प्रमुख पात्रहरूलाई समेटिएको छ । वरिष्ठ क्याप्टेन रहेका अभिनेता विजय लामाले फिल्म ‘अन्तिम संस्कार’ बजारमा आइरहेका फिल्मभन्दा फरक रहेको दाबी गर्नुभयो ।
लन्डनमा बस्दै आएका निर्देशक प्रदीप शाहीले फिल्मको निर्देशन गर्नु भएको हो । ‘अन्तिम संस्कार’मा भाइराजा थापा, राजकुमार गुरुङ, सुमन राई, उत्सव विष्ट, रवीन्द्र श्रेष्ठ कार्यकारी निर्माता छन् । विनोद सुवेदी क्षितिज निर्माता रहेको फिल्म सामाजिक एवं सांस्कृतिक कथावस्तुमा निर्माण भएको हो । ‘मर्डर मिस्ट्रि ’को कथालाई फिल्ममा समावेश गरिएको छ ।
फिल्ममा विजयका अलावा दिया पुन, एवनराज उप्रेती, त्रिचन्द्र राई, रेश्मा घिमिरे, विशाल पहारी, कृष्णभक्त महर्जन, श्याम राई, पासाङ शेर्पा, दिग्गज खत्री, सुस्मिता गिरी, आइसा तामाङ, सुरज खालिङलगायतको अभिनय छ ।
